वास्तविकता ओकल्दै छन माओबादी हरु ।

१९ मंसीर, काठमाडौ । शनिबार साँझ एमाओवादीका नेता नारायणकाजीले क्रान्तिकारी पत्रकारका १० जना नेतालाई घरमै बोलाएर खाजा काँदै गरेको अन्तरंग कुराकानी हो यो, ‘बाटाबाटामा जसलाई भेट्यो त्यसैलाई केन्द्रीय सदस्य बाड्दै हिड्ने, कार्यालयमा बसेका हामीले पछि मात्र थाहा पाउनुपर्ने ?’ तितो पोख्दै अगाडि थपे, ‘नेताहरू बादशाह जस्तो हुने, हाम्रै त यो हालत छ, अरूको झन् के बिजोग होला ! आवेगमा आएर निर्णय बहिष्कार गर्या छ, मध्यराति ‘मतगणना बहिष्कार गर’ भन्या छ । त्यस्तो चालले जितिन्छ चुनाव ?’ उनी आफ्नै नेताको खोइरो खन्दै थिए ।

‘अरूलाई देखाएर आफ्नो कमजोरी ढाक्न पाइन्न, मुख्य समस्या आफूभित्रै छ भनेर स्विकारे जनताले राम्रो मान्लान् । आवेगमा आएर जनताको अपमान गर्दा केटाकेटीपन भन्लान् ।’ आफ्नो रायको सुनुवाई नभएकोमा उनको गुनासो थियो, ‘मैले अन्तिमसम्म पनि खिलराजलाई जिम्मा नदिँऊ भनिरहे तर अध्यक्षले पेलेरै ‘यति कुरा चाँही मान्दिनुस् क्या, म जिम्मा भएँ’, भन्नुभयो । निलकण्ठलाई प्रमुख निर्वाचन आयुक्त नबनाउ भन्ने मै हुँ । वैद्यलाई नलिई चुनावमा नजाऊँ भन्दा पनि अध्यक्षले मिच्दै जानुभयो, संगठन शुन्य देखियो । कमिटीमा ठग र ठेकेदारहरू हावी भए ।’ चुनावपछीका पार्टी निर्णयमा समेत उनी सहमत थिएनन्, ‘संविधानसभामा सबैको सहमति चाहिन्छ रे ! के भनेको त्यस्तो ? राप्रपाको पनि सहमति चाहिने ? गलत कुरा कहिल्यै गर्नुहुन्न । शान्ति प्रक्रियामा सहभागीबीचको सहमति भन्नु एउटा कुरा तर जम्मैलाई समेट्ने भनेर कहाँ जायज हुन्छ ?’

उनले पार्टीका ६ वटा कमि बताए, ‘मान्छे छन्, संगठन छैन् । पहिला भोट हाल्नेलाई पनि समेट्न सकिएन, व्यक्तिगत निर्णय हुन थाले- संस्थागततिर ध्यान गएन, कांग्रेस र बुर्जुवामा भन्दा गए गुज्रेका, गन्हाएका संस्कार हावी भए, गाऊँ र जनतालाई भुलियो, राष्ट्रियतामा चुकियो, कांग्रेस-एमालेले समेत भारतको पिछलग्गु भएको आरोप लगाउने अवस्था आउनु दुःखलाग्दो कुरा हो ।’ एमाओवादीले बडो महत्व दिएका कतिपय एजेन्डाबारे पनि मतभिन्नता राखे, ‘ पहिचानसहितको समघियताबारे या त हामीले जनालाई बुझाउन सकेनौ या यस मामिलामा हामी गलत छौ । नेवार र तामाङलाई राज्य दिेने भन्यौ, तिनलै हामीलाई भोट दिएनन, उल्टै हराइदिए ।’

चुनावलाई बुझ्ने सवालमा पनि उनी भ्रममा रहेनछन्, भन्दै थिए, ‘संसदीय चुनाव भनेको जसको लाठी उसको भैसी भनेजस्तो व्यवस्था हो । जसले सक्छ उसैले लट्टीपट्टी पार्छ ।’ उनको कुरा सुनेपछी पत्रकार खिलबहादुर भण्डारीले भने, ‘हाम्रो मनको कुरा भन्नुभयो । अघि बढ्नुस्, साथ दिन्छौ ।’ पत्रकार महासंघका महासचिव ओम शर्माचाहीँ, ‘मैले र पहिलेदेखी नै एमाओवादीले जित्दैन भन्दै आएको हुँ ।’ भन्दै थिए !

यो समाचार आजको जनआस्था साप्ताहिकले प्रकाशित गरेको !